السلام عليكم و رحمة الله و بركاته
ركب محمد سيارته متوجها الى منزل صديقه خالد .. اثناء الطريق ادار المذياع على قناة اخبارية .. كل الاخبار عن نتائج الانتخابات الامريكية .. اول اسود يحكم البيت الابيض .. محللون يهللون و افارقة يرقصون .. يبدو العالم اكثر تفاؤلا .. ابتسم محمد و تمتم قائلا " والله سويتها يا بوحسين " يقصد باراك حسين اوباما
دخل محمد الى ديوانية بوهاشم يسأل عن خالد
بوهاشم: هلا محمد .. حياك استريح الحين انادي خالد
محمد " مقبلا رأس بوهاشم " : عدوك الريح عمي بوهاشم .. شلونك و شلون الصحة ؟
بوهاشم: هلا ولدي .. اصب لك جاي؟
محمد : لا خلك مرتاح عمي انا لو ابي اصب لي .. انا مو ضيف و هذا بيتي
بوهاشم: تخسي بيتك .. انا دافع فيه دم قلبي و الحين ياي انت تقول بيتك؟
محمد " ضاحكا و ملتفتا الى التلفاز " : عمي شفت بوحسين؟ والله سواها و ياب راسهم
بوهاشم: وانت مستانس يعني؟ تتوقع بوحسين مالك احسن من غيره؟
محمد " مستغربا " : اي بوهاشم . اولا هذا افريقي .. ثانيا كان ضد الحرب على العراق .. يقولك يبي يفتح حوار مع ايران بدون شروط مسبقة .. بعدين عمي هذا ديموقراطي يعني اكيد احسن من بوش و المحافظين الجدد
بوهاشم: يا ولدي هاللي مستانسين فيه بيكون اخطر منه و صدقني بيكسر فيكم كسرة قهر
محمد " مستغربا " : شلون بيكسر فينا ؟
بوهاشم " متكئا على الوسادة " : اولا اهوا عارض الحرب مو لانه ما يبي حروب لكنه يشوف الحرب مو في " مصلحة " امريكا و الاحداث اثبتت صحة كلامه و على هالاساس انتخبوه .. الحين المطلوب منه يطلع من العراق مو عشان العراقيين مساكين و حرام اللي صار فيهم .. لكن عشان وجود الجيش " مكلف " اقتصاديا و مثل ما انت عارف امريكا تمر بحالة ركود اقتصادي
محمد " مستغربا هذا التحليل السياسي العميق لرجل كويتي بسيط " : يعني ما راح يوقف ويا العرب؟
بوهاشم " مبتسما " : ليش العرب اللي انتخبوه عشان يوقف وياهم؟ شكو بالعرب اهوا؟
محمد: انزين و ايران اللي راح يحاورها بدون شروط مسبقة؟
بوهاشم: و اذا حاورها و ايران ما قبلت بكلامه؟ اذا بوش اللي " مكروه " من كل العالم قدر يفرض عقوبات و يطلع قرارات من مجلس الامن ضد ايران .. هالمرة بوحسين " المحبوب " من العالم كله ما يقدر يقرص اذن الايرانيين؟
محمد: يعني راح يطق ايران؟ بترد المنطقة تولع؟
بوهاشم : مو شرط يطقها لكن ممكن يفرض عليها عقوبات اذا ما قبلت بشروطه .. بالنهاية الريال لازم ينفذ و يحافظ على " مصالح " امريكا .. انت ما شفته راح اسرائيل و صلى عند حائط المبكى؟ مو قال انه ملتزم بامن اسرائيل و ان القدس عاصمة " موحدة " لاسرائيل .. اذا نائبه " بيدن " يقول انا صهيوني للنخاع و ان لم اكن يهوديا .. شتبي بعد ما تفهمني؟!!
دخل خالد : هلا بوجاسم يالله قوم لا نتأخر
محمد " مغادرا " : يالله مع السلامة عمي
ركب محمد السيارة وبجانبه خالد
خالد: شفيك مبلم جذي؟!
محمد : مادري ياخوي الواحد دخل بيتكم يحب اوباما طلع منه يكرهه !!!
خالد " ضاحكا " : هاهاهاها طحت بيد الوالد .. شوف الي بالسيارة هذي جني اعرفها؟ الحقها الحقها !!
الى لقاء اخر
الاشتراك في:
تعليقات الرسالة (Atom)
هناك 10 تعليقات:
والله على حسب معلوماتي انه اوباما يحب السلام و ما يبي يتعب نفسه و يشغل باله بالحروب
بس انشالله فيه بعد موضوع تكمله ؟؟؟؟
بو هاشم الله يطول عمره عنده وجهة نظر، وحتى لو أوباما يحب السلام تهقى راح يخلونه يطبق شي من قناعاته.
لكن احنا ما بيدنا الا التفاؤل... والله كريم
يوتسان .. هلا صديقي العزيز
ما اعتقد في رئيس بيقول انا مابي " اتعب نفسي " و مابي حرب
كلنا نخوض الحروب و ان كانت اشكالها و وسائلها و اهدافها تختلف من حرب الى اخرى :)
يجوز في موضوع تكملة و يجوز لا .. تعتمد على صحة بوهاشم
اسعدني مرورك
صلاح ... فعلا اتفق معاك و اعتقد ان احكامنا السياسية يجب ان تحكمها الوقائع و ليس حسن النوايا :)
شكرا لمرورك الكريم و تعليقك :)
....
مادري ياخوي الواحد دخل بيتكم يحب اوباما طلع منه يكرهه
....
ههههههه
فعلا كما تفضلت
لايوجد اي رهان
فشهاب الدين .... من اخيه
نحن ننظر للامور بالعاطفة
وهم لا عاطفة لديهم امام مصالحهم
جزاك الله خير
حفظك الله ورعاك
اول شي
المقطع الاخير ضايقني
:)
بطلو هالسوالف
-----------------------
بالنسبة للرئيس الجديد
فهناك المؤيد بشدة
وهناك المعارض بقوة
وراي الوالد
بين الاثنين الصراحة
الله يحفظة
ما علينا الا الانتظار
:)
على فكرة ..
آنا يايه أشوف الرد على تعليقي
لقيت إن التعليق بكبره مو موجود
الظاهر من العيلة الزايدة
أكيد حطيت الأحرف غلط
وبس طلعلي مسج طلعت بسرعه
عبالي اندز سو احتريت
أرد أكتب اللي أذكره من التعليق
يعجبني كثيراً الأسلوب القصصي في النقد
فلست أجزم إن كانت الأحداث هذه أو من يقوم ببطولتها حقيقه ولكنك استطعت مناقشة الموضوع بصورة محببه
بو هاشم الله يطول بعمره إن كان حقيقي
شخص استطاع التفاعل مع كثير من الأزمنه
فإن كان ما يناقشه يعبر عن وجهة نظره برأينا
من الممكن أن يكون مختزلاً لخبرات عديدة اكتسبها عبر السنين
لأن السياسة هي السياسة
وبعض السياسيين مازالوا على حماقتهم وحيلهم
وإلى مائة عام من الآن كما أظن
سيظل السياسي مستخدماً لنفس الحيل
ولكن بإسلوب تكنلوجي أكثر
سؤالي يقول؟
خالد يكتب شعر؟؟
لووووووووول
متابعه للمزيد :")
من غير شر يارب
طولت الغيبه
حفظك الله
الله يطول بعمر بو هاشم ومانقدر نعترض على وجهة نظره يايه من خبره وتفكير منطقي
بس بعد التفائل حلوو
تحياتي
لالا حدي دايخه موضوع قديم
إرسال تعليق