الثلاثاء، 26 مايو 2009

توأمين لأبوين مختلفين



صدمت أم لتوأمين عندما ابلغها الاطباء ان توأميها البالغين من العمر 11 شهرا هما لابوين مختلفين

قررت ميا واشطن و صديقها اللجوء الى اختصاصي ولادة عندما لاحظا ان توأميهما ( جوردان و جاستين ) يبدوان مختلفين . و بعد اجراء اختبارات الابوة اكتشف الاطباء ان بويضتين لقحتا بحيوانين منويين و احتمالية 99.99 % ان التوأمين لابوين مختلفين

اعترفت ميا بعد ذاك انها كانت في علاقة غرامية و انها حملت من شخصين مختلفين بنفس الوقت.
قالت ميا اثناء مقابلة مع محطة تلفزيون امريكية : من بين كل الناس في العالم توجب ان يحصل ذلك معي .. انا مصدومة
صديق ميا جيمس هاريسون اب احد التوأمين اخبر القناة الامريكية انه غفر لخطيبته خيانتها و سيعمل على تربية كلا التوأمين كأبنائه .. و لكنهما ( ميا و جيمس ) يخططان لاخبار التوأمين انهما اخان "غير شقيقان " عند بلوغهما السن المناسبة
====
المصدر هنا

الجمعة، 3 أبريل 2009

فلنمت بصمت

اجلس شامخا معتدا بنفسك

انظر الى من حولك كغنم

اخرج من جيبك السجائر

ولع سيجارة

و انفث دخانها في وجوههم

و افت في كل مسألة

ولا تقل لا اعلم

افت في السياسة و الدين و المنطق

ارجع الى بيتك ولا تهتم

فضاجع امرأتك .. ثم نم


===
ابي احط فيديو مو راضي فأحط لكم الرابط ( اللنك ) احسن
http://www.youtube.com/watch?v=993rZrfLBjg

الثلاثاء، 3 مارس 2009

بوهاشم عاجبه المجلس !!!

السلام عليكم و رحمة الله و بركاته

بدأت الاشاعات تتداول في الساحة عن حل المجلس .. الاخبار تشير الى الحل بينما القلة يخالفونهم الرأي بأن المجلس لن يحل .. خلال هذا الوضع الاستثنائي لم يجد محمد مفرا من اللجوء الى بوهاشم .. ركب سيارته و ذهب الى بيت صديقه لعله يجد بعض الاجوبة على تساؤلاته

محمد " يدخل الى الديوانية " : قوة عمي بوهاشم شلونك ان شاءالله بخير .. يقبل راس بوهاشم و يجلس

بوهاشم " مبتسما " : هلا ولدي محمد .. انا زين عمي بس صدري تعبان شوي من الغبار

محمد : سلامات عمي ما توف شر .. رحت الطبيب عمي ؟؟!

بوهاشم " مشيرا الى انبوبة الاوكسجين " : ما تشوف هالسلندر اللي يمي؟ يا ولدي صرت جني تاير مفشوش كل شوي لازم يتفخونه .. الحمدلله لك يا رب

محمد " مبتسما " : يعطيك الصحة والعافية عمي .. ما عليه بعد جونا جذي شنسوي عمي ؟

بوهاشم : والله نقدر نسوي وايد شغلات بس وين اللي يفكرون و اللي ينفذون؟ الناس يا ولدي همهم شنو ياكلون و وين يسافرون و شنو يلبسون .. كل على ليلاه يغني !!

محمد : على طاري ليلى عمي .. سمعت بيحلون المجلس .. صج هالحجي ؟!!

بوهاشم " معدلا جلسته " : يا ولدي ماكو فرق بين الحل و الخل .. ان حلوه بيردون نفس الناس و ان خلوه بنظل واقفين مكانا !! الناس اهي الناس و الحكومة اهي الحكومة .. ما تقولي شالفايدة من الحل او الخل؟

محمد " مازحا " : عمي الخل حق السلطة عالاقل !!

بوهاشم : اي سلطة فيهم؟ فتح الميم ولا ضم الميم؟

محمد " مبتسما " : ليش عمي اكو فرق بينهم؟

بوهاشم " يضحك " : لا والله يا ولدي ماكو فرق .. لا بين الحل والخل ولا بين السُلطة و السَلطة

محمد : عمي انا اقول لو يفكونا من هالمجلس احسن .. يعني خل يحلونه و نقعد بدون مجلس و كل واحد يجابل شغله احسن .. و احنا كانت امورنا زينة بدون مجلس اصلا .. شنو سوى لنا المجلس ؟ كاهم دول الخليج كلهم ما عندهم مجلس ولا برلمان و وضعهم احسن من وضعنا !!

بوهاشم " مستغربا " : نقعد بدون مجلس؟ لا يا ولدي ما هقيتها منك .. نقعد بدون مجلس شلون نعيش اصلا ؟ دول الخليج عمره وضعهم ما كان احسن من وضعنا يا ولدي ولا بيكون اذا بيقعدون بدون مجلس حقيقي يملك سلطات ( لا يهم فتح السين او ضمها في هذه الحالة )

محمد : عمي كاهي الامارات و قطر طلعت و صارت احسن منا ولا عندهم مجلس مثل مجلسنا ولا حتى نص مجلسنا .. يعني المجلس مرات ممكن يكون عائق ؟

بوهاشم : يا ولدي .. هالدول تعتمد على الحاكم .. ان كان الحاكم زين عاشوا عيشة طيبة و ان كان الحاكم شين قعدوا يصبرون و ينطرون الحاكم اللي بعده عل و عسى يكون زين .. تطورت هالدول لانه حكامهم خلال هالفترة كانوا زينين .. لكن شنو يضمن لك ان اللي يحكمونهم دائما بيكونون زينيين؟

محمد : عمي بس المجلس مالنا دائما شين .. من عرفناه و مشاكله وايد و صارت دكانة للرزق .. مرتع للوصوليين و التجار و اصحاب النفوذ فقط

بوهاشم : الديموقراطية مثل الهواء بالنسبة لنا .. حتى لو كان الهواء ملوث و متروس سموم ما راح تتنازل عن الهواء او عن التنفس .. بتنظف الهواء و بتستمر في التنفس .. المجلس يا ولدي هي التاير ( العجلة ) اللي تمشي عليه الديره .. لو فش التاير لازم تتفخه لكن عمرك ما تقدر تمشي بدون تاير .. الوصوليين و النصابين دائما بيكونون موجودين يا محمد .. لكن ما راح يقدرون يجذبون علينا دائما .. راح يجي اليوم اللي اهل الكويت بيعرفون على حقيقتهم و بترد الديرة توقف على حيلها و العجلة تمشي اسرع

محمد : ماشاءالله عليك عمي متفائل

بوهاشم : يا ولدي بليلة نمنا و قعدنا و شفنا الاخ و الجار يحتل ديرتنا .. ضاعت الديرة بساعات و مع هذا ما استسلمنا و كافحنا و ناضلنا لين تحررت الديرة .. و اللي نشوفه الحين ماهو اكبر ولا اصعب من اللي شفناه !!

محمد : اي والله صدقت عمي

يرن تلفون محمد فيستأذن للرد على التلفون .. بوهاشم يضع قناع الاوكسجين على وجهه و يؤشر بيده ان لا مانع لديه .. يتحدث محمد عبر التلفون بينما يغلق بوهاشم عينيه و يخلد الى النوم

يخرج محمد من الديوانية ليجد صديقه خالد يهم بالخروج من المنزل

محمد : هلا بو وليد .. شنو هالكشخة؟

خالد : اووه بوجاسم هني .. هلا بالزين .. الله يابك امش وياي

محمد : وين اروح وياك؟

خالد : مواعد و رفيجتي يايبة وياها رفيجتها و لازم يكون احد وياي .. و ماكو غيرك بوجاسم

يخرج الاثنان من المنزل و النقاش مستمر هل يذهب محمد مع خالد ام لا؟!

الى اللقاء

الأربعاء، 5 نوفمبر 2008

بوهاشم ما يحب اوباما !!!

السلام عليكم و رحمة الله و بركاته

ركب محمد سيارته متوجها الى منزل صديقه خالد .. اثناء الطريق ادار المذياع على قناة اخبارية .. كل الاخبار عن نتائج الانتخابات الامريكية .. اول اسود يحكم البيت الابيض .. محللون يهللون و افارقة يرقصون .. يبدو العالم اكثر تفاؤلا .. ابتسم محمد و تمتم قائلا " والله سويتها يا بوحسين " يقصد باراك حسين اوباما

دخل محمد الى ديوانية بوهاشم يسأل عن خالد

بوهاشم: هلا محمد .. حياك استريح الحين انادي خالد

محمد " مقبلا رأس بوهاشم " : عدوك الريح عمي بوهاشم .. شلونك و شلون الصحة ؟

بوهاشم: هلا ولدي .. اصب لك جاي؟

محمد : لا خلك مرتاح عمي انا لو ابي اصب لي .. انا مو ضيف و هذا بيتي

بوهاشم: تخسي بيتك .. انا دافع فيه دم قلبي و الحين ياي انت تقول بيتك؟

محمد " ضاحكا و ملتفتا الى التلفاز " : عمي شفت بوحسين؟ والله سواها و ياب راسهم

بوهاشم: وانت مستانس يعني؟ تتوقع بوحسين مالك احسن من غيره؟

محمد " مستغربا " : اي بوهاشم . اولا هذا افريقي .. ثانيا كان ضد الحرب على العراق .. يقولك يبي يفتح حوار مع ايران بدون شروط مسبقة .. بعدين عمي هذا ديموقراطي يعني اكيد احسن من بوش و المحافظين الجدد

بوهاشم: يا ولدي هاللي مستانسين فيه بيكون اخطر منه و صدقني بيكسر فيكم كسرة قهر

محمد " مستغربا " : شلون بيكسر فينا ؟

بوهاشم " متكئا على الوسادة " : اولا اهوا عارض الحرب مو لانه ما يبي حروب لكنه يشوف الحرب مو في " مصلحة " امريكا و الاحداث اثبتت صحة كلامه و على هالاساس انتخبوه .. الحين المطلوب منه يطلع من العراق مو عشان العراقيين مساكين و حرام اللي صار فيهم .. لكن عشان وجود الجيش " مكلف " اقتصاديا و مثل ما انت عارف امريكا تمر بحالة ركود اقتصادي

محمد " مستغربا هذا التحليل السياسي العميق لرجل كويتي بسيط " : يعني ما راح يوقف ويا العرب؟

بوهاشم " مبتسما " : ليش العرب اللي انتخبوه عشان يوقف وياهم؟ شكو بالعرب اهوا؟

محمد: انزين و ايران اللي راح يحاورها بدون شروط مسبقة؟

بوهاشم: و اذا حاورها و ايران ما قبلت بكلامه؟ اذا بوش اللي " مكروه " من كل العالم قدر يفرض عقوبات و يطلع قرارات من مجلس الامن ضد ايران .. هالمرة بوحسين " المحبوب " من العالم كله ما يقدر يقرص اذن الايرانيين؟

محمد: يعني راح يطق ايران؟ بترد المنطقة تولع؟

بوهاشم : مو شرط يطقها لكن ممكن يفرض عليها عقوبات اذا ما قبلت بشروطه .. بالنهاية الريال لازم ينفذ و يحافظ على " مصالح " امريكا .. انت ما شفته راح اسرائيل و صلى عند حائط المبكى؟ مو قال انه ملتزم بامن اسرائيل و ان القدس عاصمة " موحدة " لاسرائيل .. اذا نائبه " بيدن " يقول انا صهيوني للنخاع و ان لم اكن يهوديا .. شتبي بعد ما تفهمني؟!!

دخل خالد : هلا بوجاسم يالله قوم لا نتأخر

محمد " مغادرا " : يالله مع السلامة عمي

ركب محمد السيارة وبجانبه خالد

خالد: شفيك مبلم جذي؟!

محمد : مادري ياخوي الواحد دخل بيتكم يحب اوباما طلع منه يكرهه !!!

خالد " ضاحكا " : هاهاهاها طحت بيد الوالد .. شوف الي بالسيارة هذي جني اعرفها؟ الحقها الحقها !!

الى لقاء اخر

الاثنين، 3 نوفمبر 2008

بــو هــاشــــــــــم

بسم الله الرحمن الرحيم

بوهاشم هو شايب كويتي من الماضي السحيق .. من مواليد 29 يونيو 1938 .. ولد في الفنطاس و كبر في فرجانها ( حواريها ) تعلم القرأن الكريم عند المطوع و كان مشاغبا جدا رغم حفظه للكثير من اجزاء القران الكريم مما عرضه كثيرا للضرب بالخيزرانة ... حتى يأس منه والده فاخرجه و اجلسه المنزل ... عاصر الكويت قبل النفط و عندما استد ساعده ركب البحر فغاص على اللؤلؤ و ذهب الى الهند رغم صغر سنه .تعلم اللغة الهندية و احب الهنود فصادقهم و تعلم منهم قواعد التجارة و اصولها

عندما هبت رياح النفط على الكويت ترك بيت الطين و الجندل و سكن بيوت الحكومة الاسمنتية .. عرف رغد العيش فترك الغوص على اللؤلؤ و نبذ الميدار و آثر الوظيفة الحكومية في دائرة البرق و البريد .. تزوج في 19 يونيو 1961 من ام هاشم فانجبت له هاشم و خالد و نوال.
استشهد هاشم في 2 اغسطس 1990 فحزن عليه حزنا شديدا حتى هزل جسده فاصبح طريحا للفراش في ديوانيته فيزوره بين الحين و الاخر اصدقائه و جيرانه و منهم محمد صديق ابنه خالد

دعواتنا بالشفاء لبوهاشم