بوهاشم ما يحب اوباما !!!

السلام عليكم و رحمة الله و بركاته

ركب محمد سيارته متوجها الى منزل صديقه خالد .. اثناء الطريق ادار المذياع على قناة اخبارية .. كل الاخبار عن نتائج الانتخابات الامريكية .. اول اسود يحكم البيت الابيض .. محللون يهللون و افارقة يرقصون .. يبدو العالم اكثر تفاؤلا .. ابتسم محمد و تمتم قائلا " والله سويتها يا بوحسين " يقصد باراك حسين اوباما

دخل محمد الى ديوانية بوهاشم يسأل عن خالد

بوهاشم: هلا محمد .. حياك استريح الحين انادي خالد

محمد " مقبلا رأس بوهاشم " : عدوك الريح عمي بوهاشم .. شلونك و شلون الصحة ؟

بوهاشم: هلا ولدي .. اصب لك جاي؟

محمد : لا خلك مرتاح عمي انا لو ابي اصب لي .. انا مو ضيف و هذا بيتي

بوهاشم: تخسي بيتك .. انا دافع فيه دم قلبي و الحين ياي انت تقول بيتك؟

محمد " ضاحكا و ملتفتا الى التلفاز " : عمي شفت بوحسين؟ والله سواها و ياب راسهم

بوهاشم: وانت مستانس يعني؟ تتوقع بوحسين مالك احسن من غيره؟

محمد " مستغربا " : اي بوهاشم . اولا هذا افريقي .. ثانيا كان ضد الحرب على العراق .. يقولك يبي يفتح حوار مع ايران بدون شروط مسبقة .. بعدين عمي هذا ديموقراطي يعني اكيد احسن من بوش و المحافظين الجدد

بوهاشم: يا ولدي هاللي مستانسين فيه بيكون اخطر منه و صدقني بيكسر فيكم كسرة قهر

محمد " مستغربا " : شلون بيكسر فينا ؟

بوهاشم " متكئا على الوسادة " : اولا اهوا عارض الحرب مو لانه ما يبي حروب لكنه يشوف الحرب مو في " مصلحة " امريكا و الاحداث اثبتت صحة كلامه و على هالاساس انتخبوه .. الحين المطلوب منه يطلع من العراق مو عشان العراقيين مساكين و حرام اللي صار فيهم .. لكن عشان وجود الجيش " مكلف " اقتصاديا و مثل ما انت عارف امريكا تمر بحالة ركود اقتصادي

محمد " مستغربا هذا التحليل السياسي العميق لرجل كويتي بسيط " : يعني ما راح يوقف ويا العرب؟

بوهاشم " مبتسما " : ليش العرب اللي انتخبوه عشان يوقف وياهم؟ شكو بالعرب اهوا؟

محمد: انزين و ايران اللي راح يحاورها بدون شروط مسبقة؟

بوهاشم: و اذا حاورها و ايران ما قبلت بكلامه؟ اذا بوش اللي " مكروه " من كل العالم قدر يفرض عقوبات و يطلع قرارات من مجلس الامن ضد ايران .. هالمرة بوحسين " المحبوب " من العالم كله ما يقدر يقرص اذن الايرانيين؟

محمد: يعني راح يطق ايران؟ بترد المنطقة تولع؟

بوهاشم : مو شرط يطقها لكن ممكن يفرض عليها عقوبات اذا ما قبلت بشروطه .. بالنهاية الريال لازم ينفذ و يحافظ على " مصالح " امريكا .. انت ما شفته راح اسرائيل و صلى عند حائط المبكى؟ مو قال انه ملتزم بامن اسرائيل و ان القدس عاصمة " موحدة " لاسرائيل .. اذا نائبه " بيدن " يقول انا صهيوني للنخاع و ان لم اكن يهوديا .. شتبي بعد ما تفهمني؟!!

دخل خالد : هلا بوجاسم يالله قوم لا نتأخر

محمد " مغادرا " : يالله مع السلامة عمي

ركب محمد السيارة وبجانبه خالد

خالد: شفيك مبلم جذي؟!

محمد : مادري ياخوي الواحد دخل بيتكم يحب اوباما طلع منه يكرهه !!!

خالد " ضاحكا " : هاهاهاها طحت بيد الوالد .. شوف الي بالسيارة هذي جني اعرفها؟ الحقها الحقها !!

الى لقاء اخر

بــو هــاشــــــــــم

بسم الله الرحمن الرحيم

بوهاشم هو شايب كويتي من الماضي السحيق .. من مواليد 29 يونيو 1938 .. ولد في الفنطاس و كبر في فرجانها ( حواريها ) تعلم القرأن الكريم عند المطوع و كان مشاغبا جدا رغم حفظه للكثير من اجزاء القران الكريم مما عرضه كثيرا للضرب بالخيزرانة ... حتى يأس منه والده فاخرجه و اجلسه المنزل ... عاصر الكويت قبل النفط و عندما استد ساعده ركب البحر فغاص على اللؤلؤ و ذهب الى الهند رغم صغر سنه .تعلم اللغة الهندية و احب الهنود فصادقهم و تعلم منهم قواعد التجارة و اصولها

عندما هبت رياح النفط على الكويت ترك بيت الطين و الجندل و سكن بيوت الحكومة الاسمنتية .. عرف رغد العيش فترك الغوص على اللؤلؤ و نبذ الميدار و آثر الوظيفة الحكومية في دائرة البرق و البريد .. تزوج في 19 يونيو 1961 من ام هاشم فانجبت له هاشم و خالد و نوال.
استشهد هاشم في 2 اغسطس 1990 فحزن عليه حزنا شديدا حتى هزل جسده فاصبح طريحا للفراش في ديوانيته فيزوره بين الحين و الاخر اصدقائه و جيرانه و منهم محمد صديق ابنه خالد

دعواتنا بالشفاء لبوهاشم